LG და Samsung სმარტფონის დინამიკებზე უარს ამბობენ

Display Week გამოფენაზე Samsung-მა წარმოადგინა დისპლეის პროტოტიპი, რომელიც ხმას ვიბრაციით გამოსცემს. ამ ტექნოლოგიის წყალობით შესაძლებელი იქნება სმარტფონის წარმოება სტანდარტული სასაუბრო დინამიკის გარეშე. კორეაში ფიქრობენ, რომ მწარმოებელი კომერციულ ვარიანტს მომავალი წლის დასაწყისში წარმოადგენს. აღნიშნული სიახლის დანერგვაში Samsung-ს არც LG ჩამორჩება.



Samsung-მა ფაქტიურად Galaxy S8+-ის მოდიფიკაცია წარმოადგინა. მისი 6.22 დიუმის დიაგონალიანი დისპლეის ქვეშ განთავსებულია ვიბრაციის გენერატორი. საკმარისია ტელეფონი ყურზე მიიდოთ და შემომავალი ზარის ავტორის ხმას მოისმენთ, გარშემომყოფები კი ვერაფერს გაიგონებენ.

ხმის სიხშირე 100 hz-დან 8 Khz-მდე იქნება, რაც HD Voice-ის სტანდარტის შესაბამისია. ხმის გადმოცემის ხარისხი ნამდვილად ძალიან მაღალია, მაგრამ ამ ტექნოლოგიის უპირატესობა მხოლოდ ეს არ არის. - გამარტივებულია წყლისგაუმტარობის ტექნოლოგიაც. სასაუბრო დინამიკი ვიბრირებადი დისპლეით არის შეცვლილი, ე.ი. კორპუსს ერთი ხვრელით ნაკლები ექნება.

ფიქრობენ, რომ ახალი მახასიათებელი Galaxy S10-ში გაჩნდება. თუმცა შესაძლოა კომპანიამ ეს დისპლეები სხვა მწარმოებლებს მიყიდოს. თავის მხრივ LG-მ CES 2018–ზე წარმოადგინა დიდი ეკრანები Crystal Sound OLED, რომლებიც მინის ვიბრაციით გადმოსცემდნენ ხმას. როგორც ამბობენ, ამჟამად კომპანიაში მუშაობენ მობილური ვერსიების შესაქმნელად.